يا ترى ليه شركات النقل الذكي زي أوبر وكريم بيدرسوا زيادة أسعار الرحلات ؟وإيه علاقة اللى هيحصل بزيادة اسعار البنزين والسولار مؤخرا؟والزيادات الجديدة ممكن توصل لكام؟

شركات النقل الذكي في مصر زي أوبر و كريم وديدي بتدرس حاليا بجدية رفع تعريفة الركوب بنسبة لا تقل عن 15%.. وده بعد الزيادة الأخيرة في أسعار البنزين اللي قررتها لجنة تسعير المنتجات البترولية الأسبوع اللي فات.. ودي مش أول مرة السنة دي الأسعار تزيد.. ده تالت مرة بعد ما حصل زيادات في مارس ويونيو اللي فاتوا لما حصل تعويم الجنيه وارتفعت أسعار البنزين.. وكمان تذاكر المترو والقطارات

السبب الرئيسي لرفع الأسعار المرة دي هو إن تكلفة التشغيل زادت بشكل كبير على السائقين أو "الكباتن" زي ما شركات النقل بتسميهم… أسعار البنزين زادت بشكل ملحوظ ومع إن الشركات بتاخد عمولة ثابتة من الأرباح الشهرية لكن ده أثر على أرباح السائقين اللي لاقوا إنهم مش قادرين يغطوا الزيادة في التكلفة.. عشان كده الكباتن بدأوا يطالبوا الشركات إنهم يرفعوا الأسعار علشان يقدروا يستمروا في الشغل بدون خسارة

شركات النقل زي "أوبر" و"ديدي" بالفعل أخطرت السائقين إنها بتدرس الموضوع وممكن نشوف الزيادة في تعريفة الركوب مطبقة قبل نهاية شهر أكتوبر الحالي… وده يعني إنك ممكن تلاقي الرحلة اللي كنت بتدفع فيها سعر معين بقت أغلى بنسبة كبيرة في الأسابيع الجاية.

طب ايه علاقة ده برفع أسعار البنزين ؟

زي ما كلنا تابعنا الزيادة في أسعار البنزين اللي حصلت من أيام شملت كل أنواع الوقود  ولتر بنزين 80 بقى بـ 13.75 جنيه، وبنزين 92 وصل لـ 15.25 جنيه أما بنزين 95، الأغلى في الجودة فوصل لـ 17 جنيه للتر والسولار كمان ارتفع بنسبة 17.4% وبقى بـ 13.50 جنيه للتر

الزيادة دي أثرت على كل القطاعات تقريبًا بس النقل الذكي كان من أكتر القطاعات اللي اتأثرت بشكل مباشر لأن البنزين هو العنصر الأساسي اللي بيحدد تكلفة كل رحلة… وبما إن سعر الوقود بيزيد فمن الطبيعي إن السائقين هيطالبوا برفع الأسعار والشركات مش هيقدروا يرفضوا طلبهم لإنهم بيعتبروا جزء كبير من نجاح الخدمة.

شركات النقل الذكي مش بس بتحاول تلاقي حلول للسائقين لكن كمان بتحاول ترضي العملاء.. على سبيل المثال، شركة "إندرايف" بتقدم نظام مختلف شوية عن بقية الشركات بتسمح للعميل والسائق إنهم يتفقوا مع بعض على سعر الرحلة يعني العميل يعرض سعر والسائق يقرر إذا كان مناسب أو لا…و الطريقة دي ساعدت إن الأسعار تفضل عادلة شوية بالنسبة للطرفين.

لكن حتى مع النظام ده .. الزيادات اللي حصلت في البنزين والزيادات المتوقعة في تعريفة الركوب مش هتعدي من غير ما تحس بيها. ومش بس كده شركات النقل الذكي كانت رفعت الأسعار في أغسطس اللي فات بنسبة 10%، بعد زيادة تذاكر المترو والقطارات.

ايوه يعنى اسعار اوبر وكريم هتزيد ولا لأ ؟

الأيام الجاية هتكون حاسمة في تحديد الاتجاه اللي هياخده السوق.. لكن الحقيقة الواضحة هي إن ارتفاع أسعار البنزين بيضغط على كل الأطراف، سواء سائقين أو شركات أو عملاء.

ولازم من دلوقتي تسأل نفسك إنت مستعد تدفع أكتر عشان تقدر تستمر في استخدام خدمات النقل الذكي؟ ولا هتدور على بدائل تانية زي المواصلات العامة؟