هو ازاي السيسي بقى رمز للقوة المصرية في العالم وازاي خطف الأنظار في قمة بريكس وليه زعماء العالم بيتسابقوا عشان يقعدوا معاه.. تعالو نعرف الحكاية من أولها..

اي مصري شاف الرئيس السيسي في قمة بريكس اللي بتستضيفها روسيا من حقه يفخر بالحضور المهيب للرئيس السيسي وسط زعماء العالم لدرجة أنه خطف الأنظار وسلطت عليه كاميرا وسائل الإعلام العالمية الاضواء بسبب قوة الحضور وكبرياء العظمة المصرية المعروفة.. مين كان يتخيل أن مصر اللي كانت شوارعها من كان سنة بس حولتها جماعات الشر والفتنة إلى ميادين قتال والحكم فيها للرصاص والمولوتوف ومين كان يتخيل إن مصر اللي كانت علي وشك الإفلاس والسقوط في دوامة العنف والحقد والكراهية والانتقام بعد أقل من 11 سنة هيشارك زعيمها في صياغة نظام عالمي جديد وإعادة رسم خريطة القوى الاقتصادية الدولية وازاي يكون حضوره قوي بالشكل دا..

تعالوا نرجع بآلة الزمن كام سنة لورا لما خلصت البلد من كابوس مزعج ومؤامرات جوه وبره واتحدت عليها قوى إقليمية وأجهزة مخابرات معادية وحتى ميليشات ومرتزقة وكل دا في وقت الاقتصاد كان بيقترب من الصفر والخوف مسيطر على الشارع والمواطنين مش عارفين ينزلو من بيوتهم وكان الهدف نشر الفوضى وهزيمة الجبهة الداخلية وفتح ثغرات لدخول أطراف خارجية تتحكم في المشهد وتوقع البلد اللي بتحرس كل المنطقة واللي بتحمي العرب ودا كان المخطط شرق أوسط جديد بيغرق في فوضى وصراع وعنف..

في وقت افتكر فيه حلف الشيطان أنه خلاص مصر وقعت بين أيديهم كانت قواتنا المسلحة جاهزة ومتابعة كل اللي بيحصل ولما نزل الشعب المعادلة اتغيرت ومصر رجعت لأهلها وبعدها اختار الراجل اللي كان سبب كبير في عودتها إنه يبقي رئيس..

قبل السيسي ما يوصل قمة بريكس ويكون حديث الإعلام بسبب قوته والكاريزما المصرية والزعماء يتكلموا معاه على إنه بطل حقق فعلا المستحيل عشان بلده ترجع اقوى من الأول في وقت قياسي ضد قوانين الطبيعة السيسي كان قدامه معركة ملهاش نتيجة غير أنه ينجح فيها وهي إن يرجع الاستقرار للشارع والمواطن ودي كانت أقدس المهام اللي ضحت فيها مصر باغلى ولادها عشان تطرد وتكفن وتهزم الإرهاب والمرتزقة وجماعات العنف وكلنا طبعا فاكرين المشهد وقتها كان عامل ازاي.

بعد فرض الاستقرار بدأ السيسي أكبر معركة تنمية في تاريخ مصر الحديث كله وكانت ضربة البداية من التأسيس الصح للدولة عن طريق بناء بنية أساسية قوية تتتحمل اي تطور وبدأ في وقت واحد على كل القطاعات كهربا وطرق وموانئ واتصالات ونقل وإسكان وزراعة وصناعة ومدن ذكية وآلاف المشروعات التانية اللي أهلت البلد لاي استثمارات مهما كان حجمها والمعجزة اللي سجلها التاريخ للسيسي وكل المسؤولين معاه أنه قهر الزمن والمشروع اللي كان بياخد 5سنين بقي يخلص في سنة زي ما حصل كده في قناة السويس الجديدة وفي كل المشروعات اللي جت بعدها وحققت مصر أعلى معدلات تنمية في العالم قبل أزمة كورونا وبعدها عرفت الاستثمارات الضخمة طريقها لمصر وبالمليارات وعرفت البلد ازاي تشتغل صح ومع كل دا السيسي منسيش يقوي أدوات القوة للدولة المصرية من قوات مسلحة متطورة وانفتاح ونفوذ في المنطقة اللي حولينا وتأثير دولي واضح.

كل اللي عمله السيسي كان سبب إن مصر ترجع قوة مؤثرة في محيطها والعالم وخلته يفرض اسم وإرادة مصر على الجميع ويرجع الهيبة الطبيعية لاقوى واكبر دولة في المنطقة ودا كله كان وسط معارك وترصد من قوى الشر اللي حاولت تزرع الألغام في طريق البلد عشان متقومش تاني.. دا كله سبب الحضور الطاغي لزعيم مصر في قمة بريكس ونظرات الاستغراب والإعجاب من رئيس حول بلده من فوضى لقوة الكل يعمل حسابها ودلوقتي بيشارك في كتابه التاريخ برسم نظام عالمي جديد.